યેસુ-યેશુ ખ્રિસ્તી ધાર્મિક નેતા પાદરી બજિન્દર સિંહને બળાત્કારના કેસમાં આજીવન કેદની સજા ફટકારવામાં આવી છે. મોહાલી કોર્ટે તેને આ સજા આપી. જે બાદ મોહાલી કોર્ટની આસપાસ સુરક્ષા વધારી દેવામાં આવી છે.
બજિંદરને 3 દિવસ પહેલા કોર્ટે દોષિત ઠેરવ્યો હતો. જે બાદ તેમને પટિયાલા જેલમાં રાખવામાં આવ્યા હતા. બજિન્દર પર આરોપ છે કે તે મહિલાને વિદેશમાં સેટલ કરાવવાના બહાને તેના ઘરે લઈ ગયો હતો. જ્યાં તેની સાથે બળાત્કાર ગુજારવામાં આવ્યો અને તેનો વીડિયો બનાવવામાં આવ્યો. તેણે તે મહિલાને ધમકી પણ આપી હતી કે જો તે વિરોધ કરશે તો તે વીડિયો સોશિયલ મીડિયા પર પોસ્ટ કરશે.
આ કેસમાં પીડિતાના વકીલે કહ્યું કે તેને છેલ્લા શ્વાસ સુધી જેલમાં રહેવું પડશે. પીડિતાએ આ કેસમાં કોર્ટ અને પોલીસનો આભાર માન્યો. આ સજા એવા સમયે સંભળાવવામાં આવી છે જ્યારે બજિન્દર સિંહ બીજી મહિલા પર જાતીય હુમલો અને હુમલાના બીજા કેસમાં ફસાયેલ છે.
શું છે આખો મામલો, 3 મુદ્દાઓમાં જાણો…
1. બજિન્દર મહિલાને તેના ઘરે લઈ ગયો અને તેના પર બળાત્કાર કર્યો બજિન્દર સિંહ વિરુદ્ધ 2018માં મોહાલીના ઝીરકપુર પોલીસ સ્ટેશનમાં બળાત્કાર, હુમલો અને ધમકીઓનો કેસ નોંધવામાં આવ્યો હતો. મહિલાએ કહ્યું કે તે વિદેશમાં સ્થાયી થવા માગે છે. આ માટે તેણે બજિંદરનો સંપર્ક કર્યો. બજિન્દર તેને મોહાલીના સેક્ટર 63 સ્થિત તેના ઘરે લઈ ગયો. જ્યાં તેણે તેની સાથે બળાત્કાર ગુજાર્યો અને તેનો વીડિયો બનાવ્યો.
2. દિલ્હી એરપોર્ટ પરથી ધરપકડ, જામીન પર મુક્ત આ મામલે કેસ નોંધાયા બાદ, બજિન્દર સિંહની 2018માં જ દિલ્હી એરપોર્ટ પરથી ધરપકડ કરવામાં આવી હતી. બાદમાં બજિંદરને જામીન પર જેલમાંથી મુક્ત કરવામાં આવ્યો. આ મહિનાની શરૂઆતમાં 3 માર્ચે કોર્ટે બજિન્દર અને અન્ય પાંચ આરોપીઓ સામે બિન-જામીનપાત્ર વોરંટ જાહેર કર્યા હતા.
3. કોર્ટે 5ને નિર્દોષ જાહેર કર્યા, બજિન્દર દોષિત ઠર્યો 28 માર્ચે મોહાલી કોર્ટે આ કેસમાં બજિન્દર સિંહને દોષિત ઠેરવ્યો હતો. બાકીના પાંચ આરોપીઓ પાદરી જતિન્દર કુમાર અને અકબર ભાટી, રાજેશ ચૌધરી, સિતાર અલી અને સંદીપ પહેલવાનને નિર્દોષ જાહેર કરવામાં આવ્યા હતા. એક આરોપી, સુચ્ચા સિંહ, ટ્રાયલ દરમિયાન મૃત્યુ પામ્યો હતો.
